Trabada abre este martes o prazo para inscribirse nos programas Madrugadores e Ludiseráns
O Concello de Trabada iniciará este martes, 5 de agosto, o período de inscrición nos programas municipais de conciliación Madrugadores e Ludiseráns, destinados a facilitar a organización da vida familiar durante o curso escolar 2026-2027. As solicitudes poderán presentarse ata o próximo 26 de agosto, tanto de forma presencial nas dependencias municipais como a través da sede electrónica do Concello.
O servizo de Madrugadores ofrecerase en horario de 8.00 a 9.30 horas, antes do comezo das clases, co obxectivo de dar resposta ás necesidades das familias que precisan deixar aos seus fillos e fillas no centro educativo antes do inicio da xornada lectiva. Pola súa banda, o programa Ludiseráns desenvolverase entre as 15.30 e as 19.00 horas, unha vez rematadas as actividades escolares.
O alcalde de Trabada, Rubén García, destacou que estas iniciativas forman parte do compromiso do Concello coa conciliación da vida laboral e familiar, mediante a posta en marcha de servizos adaptados ás necesidades da veciñanza ao longo de todo o ano.
O rexedor lembrou que ambos os programas compleméntanse con outras propostas impulsadas pola administración local, como os campamentos organizados durante os períodos de vacacións de verán e Nadal, co propósito de ofrecer alternativas ás familias cando non hai actividade lectiva.
Desde o Concello animan ás persoas interesadas a realizar os trámites dentro do prazo establecido para garantir o acceso a estes servizos, que volverán estar operativos ao inicio do próximo curso escolar.