“Tecendo redes” transforma o Cenima de Foz nun espazo de encontro entre migración, arte e memoria cultural
O Cenima de Foz acolle desde esta semana a exposición “Tecendo redes: Migración, Arte e Lugo”, unha proposta colectiva que converte o espazo cultural focense nun punto de encontro entre creación contemporánea, diversidade e memoria migratoria.
A mostra foi inaugurada polo deputado Daniel García, no marco dun proxecto impulsado pola Rede Museística Provincial de Lugo xunto coa Asociación de Inmigrantes e Retornados/as Rioplatenses de Lugo, dentro da liña de traballo do Museo da Migración, unha iniciativa que aposta por novas narrativas arredor dos movementos humanos e a interculturalidade.
A exposición reúne nove propostas artísticas asinadas por creadores e creadoras de distintos países e disciplinas, que abordan a migración desde perspectivas vitais, emocionais e culturais. Entre os nomes participantes figuran Pedro Cantero, Alisa Smirnova, Cris Bamio, Hanoi Vidal, Evelin Ruiz, Soila Jankowska e Juan Pablo Mastroianni, entre outros, cunha mirada plural sobre as identidades en tránsito e os procesos de adaptación e memoria.
As obras ofrecen un percorrido polo impacto humano da migración, desde a perda e o desarraigo ata a construción de novas pertenzas, convertendo a sala expositiva nun espazo de reflexión compartida.
Durante a inauguración, Daniel García destacou o papel da Mariña como territorio aberto á convivencia e subliñou que a mostra “crea espazos de participación e diálogo arredor das experiencias migratorias”, lembrando que a comarca conta cunha longa tradición de acollida e diversidade cultural que iniciativas como esta axudan a reforzar.
A comisariado da exposición corre a cargo de Ana María Bereciartúa Gasperini, Leonardo Ezequiel Casado, Encarna Lago González e Daniel Manuel Vázquez Vila, que tamén incorporan á mostra pezas realizadas por usuarios do Taller da Ulloa, vinculadas á memoria migratoria e ao proxecto “Historias de vida das mulleres de Lugo cara a Barcelona”.
A inauguración contou ademais cunha performance poético-literaria de Simón Rodríguez “O Galego de Caracas” e cunha actuación musical de Henry Vidal, que acompañaron o percorrido do público polas obras, reforzando o carácter sensorial e emocional da proposta.
Nos vindeiros días, a Rede Museística ten previsto desenvolver obradoiros e actividades paralelas co obxectivo de achegar a exposición á cidadanía e fomentar o diálogo arredor da arte como ferramenta de integración e memoria colectiva.
A mostra poderá visitarse no Cenima de Foz ata o 27 de xuño.