Deportes

A RFEF informou da suspensión do duelo da próxima semana, no que o Pescados Rubén Burela FS ía contar con 6 xogadoras entre os dous combinados

A RFEF acaba de informar da suspensión do duelo entre España e o Brasil da próxima semana en Las Rozas, no que o Pescados Rubén Burela FS ía contar con 6 xogadoras entre os dous combinados. As novas restricións nos voos internacionais impedirán que se poida vivir o dobre compromiso, martes 9 e mércores 10, entre a Vermella, con Peque e Ale, e a Canarinha, con Jozi, Dany, Cami e Jane.

O Goberno decretou novas medidas para frear posibles novas cepas de COVID-19 que entraron en vigor nas últimas horas e afectan directamente aos avións de pasaxeiros procedentes do Brasil. De feito, as compañías aéreas brasileiras xa notificaron aos seus clientes que non poderán viaxar a España.

A pesar de que a totalidade das xogadoras convocadas polo combinado nacional brasileiro militan en clubs españois ou italianos, o corpo técnico da selección verde-amarela tiña pensado viaxar desde o seu país. É por isto, polo que o dobre duelo amigable hispano-brasileiro non poderá celebrarse como estaba previsto.

A RFEF e a CBFS acordaron que estes encontros entre ambas as seleccións femininas se disputen en canto a situación sanitaria o permita.