Supervisan a seguridade para a cita deportiva de O Gran Camiño
A subdelegada do Goberno en Lugo, Olimpia López, presidiu hoxe a Xunta de Seguridade para coordinar o dispositivo especial que se despregará con motivo da celebración de O Gran Camiño, unha das probas ciclistas internacionais máis relevantes do calendario deportivo.
A subdelegada destacou que “o dispositivo especial contará coa colaboración do Goberno a través das Forzas e Corpos de Seguridade do Estado, que coordinarán a regulación do tráfico, os cortes puntuais de circulación e o acompañamento da carreira, co fin de asegurar o correcto desenvolvemento dunha proba que se disputa integramente en vías públicas”.
Na reunión participaron representantes da Garda Civil de Tráfico, Garda Civil, Dirección Xeral de Tráfico (DGT), Policía Nacional, Consorcio de Bombeiros, Protección Civil, policías locais e técnicos da organización da proba, co obxectivo de garantir a máxima seguridade tanto dos ciclistas como do público ao longo do percorrido.
A etapa que discorrerá pola provincia de Lugo dará o seu pistoletazo de saída o vindeiro 15 de abril, cun percorrido de arredor de 150 quilómetros entre Vilalba e Barreiros, con saída prevista ás 11:30 horas e chegada estimada entre as 14:55 e as 15:30 horas. A proba atravesará os concellos de Vilalba, Xermade, Muras, Ourol, Viveiro, Xove, Cervo, Burela, Foz, Ribadeo e Barreiros.
Segundo se abordou na Xunta de Seguridade, trátase dunha proba deportiva dinámica en estrada que discorre por diferentes tipos de vías, o que require unha planificación exhaustiva dos dispositivos de seguridade e tráfico ao longo de todo o itinerario.
“O Gran Camiño” chega á súa quinta edición consolidado como un evento deportivo de referencia internacional, integrado no calendario da Unión Ciclista Internacional e con retransmisión en máis de 170 países, o que supón unha importante proxección para a provincia de Lugo e para Galicia.
A subdelegada destacou a importancia da coordinación entre administracións e corpos de seguridade para asegurar que unha cita deportiva desta magnitude se desenvolva con normalidade e sen incidencias, garantindo ao mesmo tempo a seguridade viaria e a mobilidade da cidadanía.