SOGAMP celebrou en Mondoñedo a súa xornada anual centrada na medicina preventiva e a saúde pública
O Auditorio Municipal Pascual Veiga acolleu este venres a XII Xornada Anual da Sociedade Galega de Medicina Preventiva e Saúde Pública (SOGAMP), un encontro que reuniu profesionais do ámbito sanitario de toda Galicia.
A cita estivo orientada á actualización de coñecementos e ao intercambio de experiencias entre especialistas en medicina preventiva e saúde pública, nun contexto de crecente complexidade nos sistemas sanitarios.
Durante a xornada abordáronse diferentes temas de actualidade, entre eles a xestión das infeccións en contornas sociosanitarias, os procesos de esterilización e a aplicación de novas tecnoloxías á prevención e control de riscos sanitarios.
O programa combinou relatorios e espazos de debate nos que os participantes puideron compartir experiencias e analizar os principais desafíos da especialidade.
O Concello de Mondoñedo agradeceu á SOGAMP e ás entidades colaboradoras a elección da cidade para a celebración deste encontro, que considera unha oportunidade para poñer en valor o coñecemento científico e a innovación no ámbito da saúde pública.