Sargadelos converterase nun gran espazo de celebración da cultura galega co III Festival Espallando Letras
O Conxunto Histórico Artístico de Sargadelos acollerá o próximo 17 de maio a terceira edición do Festival Espallando Letras, unha cita cultural organizada para celebrar o Día das Letras Galegas cun amplo programa de actividades arredor da música, a tradición, a artesanía e a convivencia.
A presentación do evento contou coa participación da alcaldesa de Cervo, Dolores García Caramés, do concelleiro Adrián Arias e de representantes das asociacións veciñais e culturais implicadas na organización: a asociación de veciños de San Román, As Espalladoras e Airiños do Xunco. O acto desenvolveuse no propio recinto de Sargadelos, escenario principal dunha xornada pensada para todos os públicos.
Durante a presentación, a rexedora cervense destacou a relevancia de impulsar iniciativas que contribúan a reforzar a lingua galega e o patrimonio cultural do municipio. Segundo sinalou, o festival busca converter Sargadelos nun punto de encontro no que tradición, cultura e participación social se dean a man nun ambiente aberto e festivo.
A programación arrancará ás 11:00 horas coa apertura oficial do recinto. Ao longo da mañá desenvolveranse diferentes actividades infantís organizadas por Cabaliño de Pau, ademais de visitas ao obradoiro de forxa artística de Telmo Cao e unha degustación de produtos de Marmeladas A Morena.
Un dos momentos centrais da xornada chegará ás 13:00 horas coa lectura homenaxe ás Letras Galegas, dedicada nesta ocasión á escritora Begoña Caamaño. A continuación haberá actuacións musicais e folclóricas a cargo de A Rebolaxe, Milicrocas e do grupo infantil SCR Ledicia.
A partir das 14:00 horas celebrarase unha comida popular con xamón cocido e empanada, aínda que desde a organización tamén animan ás persoas asistentes a levar o seu propio pícnic para compartir a xornada no recinto.
Xa pola tarde continuarán as actividades con talleres artesanais relacionados co traballo manual e coa decoración floral en Hai Larán, mentres que ás 17:00 horas terá lugar a actuación musical de Os Chiribicos, que pechará a programación prevista.
As actividades serán gratuítas, aínda que a organización recomenda realizar inscrición previa para algunhas propostas a través do teléfono habilitado para reservas. No caso de choiva, tanto a comida como as actuacións trasladaranse ao pavillón de San Román.
Desde o Concello e as asociacións organizadoras destacan que o festival non só serve para homenaxear a lingua galega, senón tamén para dar visibilidade ao tecido creativo e artesanal que mantén vivo Sargadelos durante todo o ano, convertendo este espazo nun referente cultural da comarca.