Deportes

O arqueiro do Iadovi volveu coroarse campión na segunda tirada, aumentando a súa vantaxe e mantendo vivas as opcións de revalidar o ouro da pasada tempada

A segunda tirada da Liga Galega de Sala de tiro con arco, celebrada esta fin de semana no Concello de Meis (Pontevedra), deixou de novo como protagonista ao arqueiro do Iadovi, Santiago González Villares “Sargadelos”, quen sumou outra brillante vitoria que lle permite manterse á fronte da clasificación.

O deportista mariñán mellorou o seu rexistro con respecto á primeira xornada, incrementando en catro puntos a súa marca ata acadar os 522, e volvendo ocupar o primeiro posto do podio, con 28 puntos de vantaxe sobre o segundo clasificado.

Segundo explicaron desde o club, González comezou a competición “algo frío”, logrando 258 puntos na primeira parte, pero acadou o seu mellor rendemento na segunda metade, onde sumou 264 puntos, demostrando a súa experiencia e constancia.

A falta de tres tiradas para rematar a liga, o representante do Iadovi continúa ampliando a distancia cos seus rivais. Se mantén este ritmo competitivo, podería revalidar o ouro conseguido o ano pasado, confirmándose como un dos arqueiros galegos máis destacados do momento.