Santa Cruz recupera o seu esplendor tras unha ampla actuación de mellora ambiental
A área recreativa de Santa Cruz presenta unha imaxe completamente renovada logo das actuacións levadas a cabo nos últimos meses, froito do investimento da Xunta de Galicia e da colaboración estreita coa Comunidade de Montes de Ove. Trátase dun espazo natural moi vencellado á tradición de Ribadeo, frecuentado ao longo de todo o ano tanto pola veciñanza como polas persoas visitantes.
O alcalde de Ribadeo, Dani Vega, puxo en valor o traballo realizado de maneira coordinada entre as distintas entidades implicadas, subliñando que a actuación permitiu mellorar notablemente un enclave que precisaba dunha intervención integral. Segundo explicou, Santa Cruz era unha zona con moito potencial, pero que acumulaba carencias derivadas do paso do tempo e da falta de mantemento en determinados puntos.
Entre as actuacións executadas destacan os traballos de desbroce e conservación xeral da área recreativa, así como a retirada de tuias que estaban a causar problemas na superficie do recinto. Tamén se instalaron novas varandas de madeira, renovouse por completo o miradoiro e colocáronse bancos novos, ademais de elementos de protección para evitar o acceso de vehículos. A intervención incluíu igualmente o arranxo de escaleiras e pavimentos deteriorados, así como o reforzo do muro e da estrutura do propio miradoiro, logrando un espazo máis seguro, accesible e visualmente coidado.
O rexedor destacou que todo o financiamento procede da Xunta de Galicia, sen custo económico para o Concello, e puxo como exemplo de boa xestión a colaboración entre a administración autonómica, o goberno local e a Comunidade de Montes, que participou activamente no deseño das propostas e na tramitación técnica dos proxectos.
De cara ao futuro, Dani Vega anunciou novos plans para continuar mellorando Santa Cruz, entre eles a instalación dun novo sistema de alumeado para toda a área e a rehabilitación da Casa da Ría. Neste senso, avanzou que o obxectivo non é só restaurar o edificio, senón dotalo dun uso definido, ligado á formación do alumnado, á divulgación dos valores da ría e mesmo á creación dun observatorio astronómico. Todo iso dentro dunha estratexia centrada na conservación dos espazos naturais e na posta en valor dos recursos hídricos, da fauna e da flora.
O alcalde quixo agradecer expresamente o labor da Comunidade de Montes de Ove, o apoio económico da Xunta de Galicia e o traballo dos técnicos municipais, destacando que a cooperación entre administracións é clave para obter resultados positivos na recuperación do patrimonio natural.