San Cibrao celebrará o Día do Turista cunha xornada chea de actividades para toda a familia
San Cibrao volverá converterse este sábado, 1 de agosto, nun punto de encontro para veciñanza e visitantes coa celebración dunha nova edición do Día do Turista, unha iniciativa impulsada polo Centro de Iniciativas Turísticas (CIT) coa colaboración do Concello de Cervo. A cita ofrecerá unha ampla programación pensada para todas as idades co obxectivo de promover o ambiente festivo, dinamizar a actividade na localidade e poñer en valor o seu atractivo turístico.
A presentación da xornada contou coa participación da alcaldesa, Dolores García Caramés; da concelleira Mali Méndez; e de representantes da directiva do CIT, organizador dun evento que cada verán busca reforzar a convivencia entre residentes e persoas que elixen San Cibrao como destino vacacional.
As actividades comezarán pola mañá na praia do Torno cun concurso de castelos de area. As inscricións realizaranse no propio areal entre as 11.00 e as 11.30 horas. Posteriormente, ás 14.30 horas, a sede do CIT acollerá unha degustación de salpicón de bonito aberta aos asistentes.
Xa durante a tarde, a Praza dos Campos será escenario dunha sesión de pintacaras para os máis pequenos a partir das 17.00 horas. Como peche da programación, ás 19.00 horas dará comezo o desfile e concurso do Entroido de Verán, unha das propostas máis agardadas da xornada, que estará acompañada de música a cargo dun DJ.
Durante a presentación, a alcaldesa destacou o labor que desenvolve o Centro de Iniciativas Turísticas ao longo de todo o ano na organización de actividades que contribúen a dinamizar San Cibrao e ampliar a súa oferta de lecer. Así mesmo, animou tanto á veciñanza como aos turistas que pasan o verán no municipio a participar nesta celebración.
Desde o Concello de Cervo reiteraron a súa vontade de continuar colaborando co tecido asociativo local para impulsar iniciativas que favorezan a promoción turística do municipio e reforcen a súa posición como un dos destinos de referencia da Mariña.