Rouco acusa ao goberno local de falta de transparencia e mala xestión económica en Burela
O portavoz do Partido Popular de Burela, Manuel Rouco, manifestou o seu malestar ante a falta de respostas do goberno municipal ás cuestións que a súa formación puxo sobre a mesa no último pleno. Segundo explica o popular, o PSOE criticou nas redes sociais os datos que expuxo o seu grupo sobre o peche de negocios e o desemprego, pero “seguimos agardando a que a alcaldesa faga públicos os seus propios datos para desmentirnos, algo que aínda non fixo dende o inicio do mandato”.
Rouco tamén reclama transparencia no financiamento das festas patronais, sinalando que o goberno asegurou en pleno que destinara algo máis de 60.000 euros, mentres que, segundo as contas do PP, a cifra real superaría os 90.000 euros.
Outro dos puntos que denuncia o popular é o incumprimento do pagamento das primas de produtividade aos traballadores municipais. “Prometeron 200.000 euros, pero finalmente non foi posible cumprilo porque era ilegal, tal e como advertimos naquel momento”, explica.
O portavoz do PP tamén acusa á alcaldesa de ofrecer información enganosa sobre o sentido do voto do seu grupo en sesións plenarias. Afirma que, en casos como o das denuncias por cuestións salariais dalgunhas traballadoras municipais contra o Concello, o goberno local asegurou que o PP votara en contra, cando realmente decidiran non votar como medida de protesta polas irregularidades detectadas no expediente.
Rouco considera que a prioridade da alcaldesa debería ser a boa xestión do Concello en lugar de centrarse en criticar á oposición. “Levamos cinco anos de caída da actividade económica en Burela. En decembro de 2019 había 661 negocios e en decembro de 2024 quedaban 575, a pesar da apertura de 20 novos establecementos o ano pasado. Se isto non tivera pasado, superaríamos a cifra de 100 negocios pechados nos últimos cinco anos”, afirma.
En canto ao paro, Rouco insiste en que os datos non deixan lugar a dúbidas: “No último ano, Burela liderou, xunto con Viveiro, o incremento do desemprego na Mariña. No que vai de mandato, sumamos 41 parados máis, converténdonos no municipio con peores cifras nesta materia”.
O popular tamén cuestiona a negativa do goberno local a adherirse á Rede de Concellos Emprendedores da Xunta, unha medida que, ao seu ver, axudaría a dinamizar a economía local. Do mesmo xeito, critica a postura do executivo municipal respecto das bonificacións fiscais a autónomos e pemes. “Non entendemos por que se opoñen a que os veciños que cumpren os requisitos poidan beneficiarse de rebaixas de ata o 95% no IBI, IAE ou ICIO. Sabemos que esta medida vai en contra do ideario socialista e da súa alta presión fiscal, pero a realidade é que incentivar fiscalmente aos negocios favorece a súa actividade e a xeración de emprego”, conclúe.