A Romaxe Viquinga de O Vicedo confirma a Tim O’Sullivan como primeira actuación internacional da IX edición
O Vicedo xa comeza a perfilar a programación da IX edición da Romaxe Viquinga e faino cun primeiro anuncio destacado: a actuación do músico irlandés Tim O’Sullivan, que se converte no primeiro nome confirmado desta nova convocatoria. O artista actuará o sábado 25 de xullo ás 19.00 horas, achegando á celebración sons tradicionais directamente desde Irlanda.
A presenza de O’Sullivan enmárcase nunha edición que volverá converter a praia de San Román e o núcleo do Vicedo nun escenario de recreación histórica inspirado no mundo viquingo e medieval. A festa desenvolverase os días 24 e 25 de xullo e reunirá un amplo programa de actividades dirixidas a todos os públicos.
Entre as novidades da programación figura tamén a participación de Amélie Trotet, chegada desde Nova Caledonia, que ofrecerá o espectáculo de animación "Os Zancos da Natureza". A artista percorrerá o recinto sobre zancos o sábado 25 de xullo, entre as 15.45 e as 19.00 horas, achegando un toque visual e interactivo á celebración a través desta proposta itinerante.
A programación infantil contará ademais coa presenza de Oviravai, que presentará o concerto espectáculo 'Paio, o poder da música' o sábado 25 de xullo ás 15.45 horas dentro da Romaxe Viquinga. A proposta, chegada desde Galicia, está pensada para o público familiar e reforza a aposta da festa por combinar recreación histórica, música e actividades para todas as idades.
A programación arrancará o venres 24 de xullo coa lectura do pregón e un desfile polas rúas da localidade, no que viquingos e cristiáns compartirán protagonismo nun primeiro achegamento ao ambiente da festa.
Xa o sábado 25, a praia de San Román será o epicentro da celebración, cunha completa posta en escena que incluirá campamentos viquingos e cristiáns, mercado medieval e diversas propostas de animación. Entre os actos máis esperados figura o tradicional desembarco viquingo, previsto para as 12.30 horas, unha recreación histórica que se converteu nun dos sinais de identidade do evento.
Pola tarde, ademais da animación itinerante de Amélie Trotet, a programación continuará ás 19.00 horas co concerto de Tim O’Sullivan, seguido ás 20.00 horas dun torneo a cabalo. Xa ás 22.30 horas terá lugar o enterramento viquingo, outro dos momentos máis simbólicos da romaxe. A xornada pecharase cun espectáculo musical, nunha fin de semana que combina historia, participación popular e cultura.