Ribadeo sumará seis vivendas públicas de alugueiro no casco histórico para menores de 36 anos
Ribadeo contará proximamente con seis novas vivendas públicas de alugueiro situadas no corazón do seu casco histórico, que estarán destinadas de maneira preferente a persoas menores de 36 anos. As futuras vivendas localizaranse nos números 2 e 4 da rúa Bispo Veres e no número 32 da rúa Trinidade, inmobles que serán rehabilitados ao abeiro do Plan Rexurbe, cun investimento global de 2,3 millóns de euros por parte da Xunta de Galicia.
O proxecto xa se atopa publicado no perfil do contratante, polo que as empresas interesadas en executar as obras poden presentar as súas ofertas ata o vindeiro 19 de febreiro. A actuación permitirá recuperar edificios emblemáticos da zona histórica de Ribadeo e poñelos ao servizo da cidadanía mediante vivenda pública en réxime de alugueiro.
O alcalde de Ribadeo, Dani Vega, explicou que o reparto das vivendas será de dúas na rúa Trinidade e catro na rúa Bispo Veres, destacando o seu emprazamento privilexiado. Segundo indicou, trátase de inmobles “con vistas directas á ría de Ribadeo e ao casco histórico”, nun entorno que cualificou de singular. O rexedor subliñou que o Concello mantén unha estratexia clara en materia de vivenda, apostando por buscar novas oportunidades e promover a construción e rehabilitación de inmobles, un camiño que, segundo afirmou, “estamos a percorrer e imos conseguir”.
Vega tamén sinalou que esta actuación responde a dous dos obxectivos marcados polo actual goberno municipal: impulsar políticas de vivenda e dar resposta ás necesidades da veciñanza, cumprindo cos compromisos adquiridos. Ademais, agradeceu o apoio e os investimentos realizados pola Consellería de Vivenda e Planificación de Infraestruturas en Ribadeo.
Pola súa banda, a conselleira María Allegue explicou que as seis vivendas serán adxudicadas en réxime de alugueiro ás persoas inscritas no rexistro de demandantes do Concello de Ribadeo, establecendo como criterio prioritario a idade, con preferencia para menores de 36 anos. Allegue destacou que o obxectivo principal deste tipo de actuacións é revitalizar os cascos históricos e contribuír á súa dinamización social e residencial.
Durante a visita tamén interveu a proxectista da actuación, Lucía Fernández, quen detallou as características técnicas da rehabilitación, os materiais que se empregarán e a distribución interior das futuras vivendas. Ao acto asistiron igualmente o director territorial da Consellería de Vivenda en Lugo, Marco Antonio Piñeiro, así como varios membros da corporación municipal.