Ribadeo recupera a memoria da Revolución Galega de 1846 cunha proxección no Teatro
O Teatro de Ribadeo acollerá este venres 23 de outubro a proxección de "1846. Revolución Galega", un documental que afonda nun dos episodios destacados da historia contemporánea galega. A actividade, organizada pola Asociación Cultural Francisco Lanza, comezará ás 20:00 horas e permitirá achegarse aos acontecementos que desembocaron no fusilamento dos Mártires de Carral.
A sesión contará coa participación de César Caramês, profesor de Lingua e Literatura Galegas en Moraña e autor do estudo no que se basea a peza audiovisual. A proposta busca revisar este capítulo histórico e afondar nas súas consecuencias, así como na súa relación coa construción da identidade colectiva galega.
A produción forma parte do traballo da Fundación Galiza Sempre para recuperar e divulgar feitos relevantes da historia do país que permaneceron durante anos nun segundo plano. En 2021, a entidade publicou un monográfico sobre os Mártires de Carral, escrito por Xusto Beramendi, con motivo do 175 aniversario daqueles acontecementos.
En 2022, editou un segundo volume centrado en Antolín Faraldo, da autoría de Henrique del Río, coincidindo cos dous séculos do seu nacemento. A publicación dedicada á Revolución Galega, asinada por César Caramês, completa esta liña de traballo coincidindo co 180 aniversario do levantamento de 1846.
A Asociación Cultural Francisco Lanza mantén así a súa aposta pola divulgación histórica a través de actividades abertas á cidadanía e de propostas que contribúen a coñecer mellor o pasado galego.