Hodei levará a Ribadeo unha experiencia de maxia inmersiva co seu espectáculo en 360 graos
O ilusionista navarro Hodei, distinguido co Premio Nacional de Maxia 2025, levará a Ribadeo unha forma diferente de achegarse á maxia co espectáculo "3 Elementos – Una experiencia mágica inmersiva 360º". A proposta poderá verse o domingo 25 de outubro no Auditorio Hernán Naval, con dúas sesións programadas ás 19.30 e ás 20.30 horas, dentro da oitava edición de Camiño Escena Norte (CEN).
A montaxe rompe coa disposición habitual dos espectáculos de maxia ao situar o artista no centro e rodeado polo público. Este formato, cun aforo reducido, busca crear unha atmosfera próxima na que os asistentes poidan vivir a experiencia desde todos os ángulos e sentirse parte do que acontece durante a función.
Ao longo de 40 minutos, Hodei combina ilusións, relatos e emocións arredor de tres conceptos: creatividade, curiosidade e paixón. Son cualidades asociadas á infancia que, segundo a idea que inspira o espectáculo, poden quedar limitadas co paso á vida adulta. A montaxe propón recuperalas a través dunha viaxe multisensorial pensada para sorprender e implicar os espectadores.
"3 Elementos" está dirixido a todos os públicos a partir dos 7 anos. As entradas custan 10 euros, cunha tarifa reducida de 5 euros para persoas desempregadas, xubiladas e estudantes. Poderán adquirirse na billeteira do Auditorio Hernán Naval desde 30 minutos antes de cada representación.
A actuación supón a última parada de Camiño Escena Norte na provincia de Lugo nesta edición, un circuíto que promove o intercambio cultural a través das artes escénicas.