Ribadeo organiza unha saída ás Termas de Cuntis dentro do programa Muller e Benestar
O programa Muller e Benestar: Tempo para Ti, impulsado polo Concello de Ribadeo, continuará o vindeiro 25 de outubro cunha saída ás Termas de Cuntis, unha proposta pensada para favorecer o descanso, o coidado persoal e a convivencia entre as participantes.
Trátase da segunda excursión organizada ao longo deste ano no marco desta iniciativa. Desde o Centro de Información ás Mulleres (CIM) explican que o programa busca "ofrecer ás mulleres de Ribadeo un espazo de descanso, coidado e tamén para compartir unha xornada diferente".
A expedición partirá ás 8.30 horas desde a Escola de Música de Ribadeo. O Concello asumirá o custo do transporte, mentres que cada participante deberá aboar a modalidade que escolla para desfrutar da xornada nas instalacións termais.
A concelleira de Igualdade, Begoña Sanjurjo, detallou que haberá dúas alternativas: acceso ao spa por 17 euros ou entrada ao spa con comida por 42 euros.
Para esta nova actividade de "Tempo para Ti" habilitáronse 50 prazas. O período de inscrición abriu este 25 de setembro e permanecerá dispoñible ata o 15 de outubro.
As mulleres interesadas poden anotarse no CIM de Ribadeo, situado no Auditorio Hernán Naval, número 14, ou solicitar información a través do teléfono 982 120 739.
A iniciativa dá así continuidade á programación municipal dirixida a crear espazos específicos nos que as mulleres poidan desconectar das rutinas cotiás, dedicar tempo ao seu benestar e compartir experiencias nun ambiente de lecer e convivencia.