Ribadeo estrea o seu primeiro Trail con tres modalidades e unha andaina popular
Ata o 1 de outubro permanece aberto o prazo de inscrición para participar no I Trail de Ribadeo, unha cita deportiva organizada polo Concello que pretende consolidarse no calendario de carreiras da comarca. A proba desenvolverase o domingo 5 de outubro, ofrecendo un escenario no que se mesturan o reto físico e a beleza do patrimonio natural ribadense.
O concelleiro de Deportes, Francisco José Silvent, subliñou que o evento contará con tres modalidades: un trail longo de 24 quilómetros, un trail curto de 12 e unha andaina popular tamén de 12 quilómetros. “Para os trails será necesario ter cumpridos os 18 anos, mentres que na andaina poderán participar mozos e mozas desde os 12, sempre acompañados dun adulto responsable”, indicou.
As inscricións poden realizarse a través da web www.trailderibadeo.com cun custe de 20 euros para a modalidade longa, 15 para a curta e 10 para a andaina. A cota inclúe seguro de accidentes, dorsal con chip para as probas de trail, avituallamentos, bolsa, asistencia técnica e un agasallo conmemorativo. O número de prazas é limitado: 150 para o trail longo, 250 para o curto e 200 para a andaina.
Establécense distintas categorías competitivas, nas que os tres primeiros clasificados recibirán trofeos. Silvent destacou que “será unha boa maneira de dar a benvida ao outono facendo deporte ao aire libre o vindeiro 5 de outubro. Confiamos en que a cita teña unha ampla resposta e sexa un éxito”.