Ribadeo dálle ritmo aos domingos cunha nova edición do Domingueo
Ribadeo énchese de notas musicais co regreso do Domingueo, unha iniciativa que busca converter os domingos pola mañá nun reclamo para quen desexe pasear, mercar ou gozar dun vermú en boa compañía. Desde o 27 de abril ata o 6 de xullo, seis xornadas combinarán concertos ao vivo con actividade comercial e hostaleira nos recunchos máis animados da vila.
A proposta, impulsada polo Concello coa colaboración do tecido económico local, pretende reforzar o atractivo das fins de semana en Ribadeo, especialmente agora que a primavera anima a saír á rúa. A concelleira de Comercio, Marta Saiz, destacou que “as mañás de domingo xa son un momento de encontro para moitas persoas chegadas de toda a contorna, e con este toque musical queremos facelas aínda máis especiais”.
A primeira cita será este domingo, 27 de abril, coa actuación do grupo Manopuesta na rúa San Roque a partir das 13:00 h. A programación continuará os días 4 e 25 de maio, 15 e 29 de xuño e 6 de xullo, con novas bandas e escenarios que se anunciarán a medida que se acheguen as datas.
“Queremos crear un ambiente único, onde mesturar compras, terrazas e conversas ao son da música. A primavera dálle á vila unha luz especial, e iniciativas como esta contribúen a que Ribadeo se converta nun destino aínda máis atractivo”, sinalou Saiz.
Pola súa parte, desde o sector comercial poñen en valor o feito de que Ribadeo conte con establecementos abertos os domingos pola mañá, algo pouco habitual noutras localidades. Isto permite que cada fin de semana chegue un fluxo constante de visitantes procedentes de distintos puntos de Galicia e Asturias, consolidando o municipio como referencia comarcal.
O Domingueo non é só un evento cultural, senón unha ferramenta para dinamizar a economía local, fomentar a desestacionalización do turismo e atraer tanto a visitantes habituais como a novas persoas que descubran a vila ao ritmo da música.