Ribadeo celebra a XI Feira do Libro con música, teatro, contos e homenaxes
Ribadeo prepárase para vivir unha nova edición da súa Feira do Libro, “Letras no Campo”, que este ano acada a súa undécima edición e desenvolverase do 23 ao 25 de maio no Campo de San Francisco. Durante estas tres xornadas, as letras, a música, o teatro e as tradicións galegas convivirán nun espazo pensado para a participación de grandes e pequenos.
O recinto contará con sete casetas de librarías e editoras que poderán visitarse en horario de mañá (de 11:30 a 13:30 h) e de tarde (de 17:00 a 20:30 h). A programación abrangue múltiples actividades, organizadas arredor de varias liñas temáticas.
A concelleira de Cultura, Begoña Sanjurjo, destacou que unha das protagonistas desta edición serán as cantareiras, homenaxeadas este ano no Día das Letras Galegas. O seu legado será lembrado cun concerto didáctico, un obradoiro de reciclaxe, a actuación do grupo Xeitosiñas e a presentación do libro colectivo Somos Cantareiras, prevista para o domingo ás 12:00 horas da mañá.
Outra das apostas da feira será a visibilización do galego de Asturias, cunha lectura teatral titulada Xa somos europeos, que terá lugar o sábado ás 20:00 horas, e coa presentación dun libro sobre a lingua e identidade na zona eonaviega o domingo á mesma hora. Tamén se poderá visitar unha exposición vinculada ao galego asturiano, con fondos da Biblioteca Pública Municipal El Viejo Pancho.
As publicacións locais terán o seu espazo propio. O venres, Carlos Álvarez Lebredo presentará Novas historias ribadenses con pentagramas, mentres que o sábado será a quenda de A vila de Ribadeo: unha praza forte en la costa de Galicia desde la Idade Media, de Alberto Paraje. O mesmo día ás 19:00 h, falarase da Escola de Náutica e Comercio da vila, e o domingo ás 13:00 h renderase homenaxe á escritora Aurora Sampedro.
A feira tamén acollerá actividades pensadas para o público infantil, como os contacontos A cebra Camila e O Lobo Feliz. Ademais, Olga Novo, Premio Nacional de Poesía 2020, será a encargada de dar o pregón, e a clausura correrá a cargo dunha conversa musical titulada O son dun amor que ficou, con Luis Pulpeiro.
Finalmente, o domingo ás 17:30 h farase entrega dos premios da fase local do certame escolar de narración e debuxo das Letras Galegas. “Vémonos nas Letras no Campo”, convidou a edil de Cultura.