Ribadeo acolleu o Torneo Internacional das seleccións de baloncesto feminino U18
![torneo-internacional-baloncesto-Ribadeo](https://amarinaxa.com/wp-content/uploads/2024/07/torneo-internacional-baloncesto-Ribadeo.jpg)
Máis de 2.000 persoas asistiron ao Torneo Internacional que disputaron as seleccións de baloncesto feminino U18 de Croacia, Polonia, Hungría e España entre o 18 e o 20 de xullo no pavillón municipal de Ribadeo, mentres que outras 3.000 persoas seguiron as retransmisións vía streaming.
O concelleiro de Deportes, Francisco José Silvent, subliñou: “Estamos moi contentos de recibir en Ribadeo un verán máis á selección española de baloncesto feminino U18. Na nosa vila contamos cunhas instalacións deportivas de primeiro nivel que nos permiten acoller esta tipo de eventos deportivos: concentracións e torneos internacionais, como os que a selección española ven de disputar do 18 ao 20 de xullo coas de Croacia, Polonia e Hungría”.
Silvent engadiu: “Ribadeo é unha vila que vive de xeito especial o baloncesto, grazas ao traballo que realiza o CB Ría de Ribadeo, club co que desde o Concello estamos a colaborar. Grazas ás seleccións que participaron neste torneo internacional. Agardamos seguir contando con elas en anos vindeiros. Estas rapazas son un exemplo para as nenas de Ribadeo que tamén se está a iniciar ou que xa practican este deporte”.
A selección española seguirá concentrada en Ribadeo ata o vindeiro 29 de xullo.