Ribadeo acollerá un récord de 937 corredores na X Media Maratón Ribadeo-As Catedrais
A X Media Maratón Ribadeo-As Catedrais, que terá lugar este sábado, 14 de setembro, contará cun récord histórico de 937 corredores e corredoras. O prazo de inscrición pechouse a pasada media noite, e a cifra alcanzada é a máis alta na historia desta proba, segundo anunciou o concelleiro de Deportes, Francisco José Silvent.
Silvent expresou a súa satisfacción con estes datos e afirmou: “Estamos moi contentos cos datos de inscrición na X Media Maratón Ribadeo-As Catedrais. Pechamos a inscrición esta noite con 937 participantes, o que constitúe un auténtico récord para esta proba”.
O edil destacou que a media maratón está gañando popularidade cada ano, atraendo a máis atletas que tamén veñen acompañados das súas familias e amigos, o que beneficia notablemente ao sector turístico local. “Moitos dos corredores aproveitan a ocasión para pasar a fin de semana en Ribadeo, o que supón un impulso para os hoteis, restaurantes e comercios da vila. Deporte e turismo van de a man nestes eventos deportivos, que axudan a prolongar a tempada de verán”, subliñou Silvent.
O concelleiro tamén quixo agradecer “a labor de todo o voluntariado que fará posible que a proba se desenvolva nas mellores condicións posibles e sen incidencias”, así como “a todos os colaboradores e patrocinadores que apoian un ano máis a Media Maratón Ribadeo-As Catedrais, que encherá de deportistas e acompañantes a nosa vila a vindeira fin de semana”.