Ribadeo acollerá mañá un torneo de hockey liña
![ribadeo hockey en lina torneo 1](https://amarinaxa.com/wp-content/uploads/2022/03/ribadeo-hockey-en-lina-torneo-1.jpg)
Ribadeo acollerá o vindeiro domingo, 6 de marzo, un torneo de hockey liña no que se darán cita varios equipos asturianos nas categorías de benxamín, infantil e senior. O evento foi presentado no salón de plenos do Concello polo Club de Hockey Illa Pancha de Ribadeo.
O directivo do Club de Hockey Illa Pancha, Miguel Otero, dixo que “este é un deporte minoritario dentro dos minoritarios, pero moi espectacular e moi bonito. Ven ser unha adaptación do hockey xeo en pista seca co cal toda a rapidez e a espectacularidade segue presente. Queremos invitar a todo o mundo que veña velo e agradecerlle sempre ao Concello de Ribadeo a súa implicación con nós porque sen a pista pouco se podería ter feito. Afortunadamente dispoñemos dunha das tres pistas de Galicia oficias de hockey, non hai máis que tres e nós temos unha. A nosa intención é que sexa tamén un nexo de colaboración entre Asturias e Galicia porque é un deporte en auxe entre as dúas comunidades. A verdade é que nos apetece un montón que haxa relación e sobre todo que se potencie a actividade para os nenos e as nenas, que é o que máis nos importa. Ao fin e ao cabo todo isto facémolo polos rapaces e que vexan que hai moitos deportes, moito onde elixir e que se divirtan moito, sobre todo iso”.
A adestradora Soledad García subliñou que “quero fomentar o deporte feminino e que se coñeza pola zona o deporte en xeral do hockey liña para xuntar xente tanto de Asturias como de Galicia e que poidamos crecer como club e como equipo. Participan neste torneo sete clubs de diferentes zonas de Asturias e algúns son mixtos polo que queremos favorecer a inclusión do deporte dos nenos e nenas nos mesmos equipos con igualdade”.
O evento deportivo desenvolverase no pavillón municipal desde as dez e media da mañá.