Ribadeo acollerá a primeira manga da Liga Nacional de Clubs de Bádminton Segunda Ouro
Ribadeo converterase os días 24 e 25 de xaneiro no epicentro do bádminton nacional coa celebración da primeira manga da Liga Nacional de Clubs Segunda Ouro, unha cita deportiva que reunirá na vila arredor de 150 participantes pertencentes a once equipos.
O concelleiro de Deportes, Francisco José Silvent, explicou que os clubs participantes proceden de distintos puntos da península, así como das Illas Canarias, e competirán polos primeiros puntos dunha liga que se presenta moi disputada desde o seu inicio. As xornadas desenvolveranse no pavillón municipal, cun horario continuado desde as nove e media da mañá ata as seis da tarde.
Silvent salientou que Ribadeo arrinca o ano 2026 cunha intensa programación deportiva durante as fins de semana. Tras a celebración do campionato de cross o día 17, o bádminton tomará o relevo cun evento de ámbito estatal que, segundo indicou, supón un importante impulso para a hostalería local durante a tempada invernal. Ademais, subliñou que estas citas deportivas contribúen a proxectar a imaxe da vila e a dar a coñecer os seus atractivos turísticos.
A organización da primeira manga da Liga Nacional de Clubs Segunda Ouro de Bádminton corre a cargo de A Mariña Bádminton e España Bádminton, contando coa colaboración da Xunta de Galicia, a Deputación de Lugo e o Concello de Ribadeo, entre outras entidades.