Ribadeo acolle unha nova edición do Ribadeo Basket Pro, un stage feminino de alto nivel
Ribadeo volverá ser este verán escenario do Ribadeo Basket Pro 2025, un stage de perfeccionamento técnico-táctico de baloncesto feminino, que se celebrará entre o 13 e o 19 de xullo e está dirixido a xogadoras nadas no ano 2011 ou anteriores.
O obxectivo desta iniciativa é ofrecer unha formación integral a través de adestramentos específicos, traballo individualizado, mellora de fundamentos técnico-tácticos tanto ofensivos como defensivos, preparación física adaptada ao xogo e asesoramento en nutrición deportiva.
O concelleiro de Deportes, Francisco José Silvent, destacou que “as rapazas que participen neste stage recibirán ensinanza directa de adestradores de primeiro nivel, así como de preparadores físicos e fisioterapeutas especializados”. E engadiu: “seguimos apostando polo baloncesto e acollendo en Ribadeo actividades que fomenten a práctica deportiva feminina. Agardamos que moitas mozas se animen a formar parte desta edición”.
O evento está organizado pola entidade Droce, e conta co apoio financeiro da Área de Deportes da Vicepresidencia da Deputación de Lugo, así como coa colaboración da Xunta de Galicia, o Concello de Ribadeo, o Club Baloncesto Ría de Ribadeo, Ensino Lugo, Jim Sports e Candelas.
Durante unha semana, Ribadeo converterase nun punto de encontro para xogadoras con interese en seguir medrando no ámbito do baloncesto, nun contexto formativo, profesional e tamén lúdico. Esta nova edición reforza o compromiso institucional e organizativo coa promoción do deporte base e da igualdade no deporte.