Ribadeo Accesible pecha a temporada tras achegar o mar a centos de persoas
Ribadeo puxo fin á temporada de baño adaptado do programa Ribadeo Accesible, unha iniciativa que permitiu durante os últimos meses que centos de persoas con discapacidade ou mobilidade reducida puidesen desfrutar do mar contando co apoio necesario para facelo de maneira segura.
O servizo, que comezou o pasado 15 de xuño, desenvolveuse na praia de Os Bloques e estivo prestado por Cruz Vermella. Ao longo do verán, o persoal encargado da iniciativa facilitou o acceso á auga e acompañou as persoas usuarias, contribuíndo a eliminar algunhas das barreiras que poden dificultar o desfrute do litoral.
A clausura serviu tamén para reunir parte das persoas implicadas no desenvolvemento do programa. No encontro participou o equipo responsable do baño adaptado durante a temporada, xunto coa técnica local de Cruz Vermella, a coordinadora da entidade na Mariña e o secretario provincial da organización. Tamén asistiron o alcalde de Ribadeo e a concelleira de Servizos Sociais.
Como recordo dos últimos meses de actividade, durante o acto entregáronse ao rexedor e á edil varias láminas con imaxes dalgúns dos momentos vividos ao longo do verán en Os Bloques.
Desde Cruz Vermella destacaron o labor realizado polo equipo que prestou o servizo e a colaboración mantida co Concello de Ribadeo para sacar adiante o programa. A entidade subliña a importancia de iniciativas deste tipo para favorecer que as persoas con discapacidade ou problemas de mobilidade poidan acceder á praia e ao baño en igualdade de condicións.
Co peche da temporada conclúe o dispositivo de baño adaptado correspondente a este verán. Cruz Vermella incide, con todo, en que o traballo pola accesibilidade e pola eliminación de barreiras continuará formando parte das súas prioridades máis alá do período estival.