Ribadeo abre a preinscrición para os seus Campamentos de Verán con colonias urbanas e estancias en Allariz
O Concello de Ribadeo vén de anunciar a apertura do prazo de preinscrición para os Campamentos de Verán, unha iniciativa consolidada que ofrecerá tanto colonias urbanas como estancias en plena natureza. As solicitudes poderán presentarse entre o 21 e o 30 de abril, segundo informou o edil de Mocidade, Francisco José Silvent.
A proposta inclúe, por unha banda, as tradicionais colonias urbanas que se desenvolverán no CEIP Gregorio Sanz, e por outra, campamentos no albergue de Allariz (Ourense), ampliando así a oferta de actividades para a infancia e a mocidade durante o verán. Esta programación conta co respaldo do Plan Corresponsables, cofinanciado pola Consellería de Política Social e Igualdade e o Ministerio de Igualdade.
O concelleiro subliñou que esta iniciativa responde á vontade municipal de crear “espazos seguros, inclusivos e educativos que favorezan o desenvolvemento integral da rapazada”, ao tempo que se facilita a conciliación da vida familiar e laboral. As actividades están pensadas para nenos, nenas e mocidade do municipio, ofrecendo alternativas de lecer estruturado durante o período estival.
No caso das colonias urbanas, organizaranse en cinco quendas entre finais de xuño e finais de xullo, cun horario adaptado ás necesidades das familias, desde as 8:00 ata as 15:00 horas. O programa inclúe unha ampla variedade de propostas, como actividades deportivas, xogos colectivos, xincanas, obradoiros creativos e excursións. Ademais, tamén se contemplan iniciativas específicas para a mocidade de maior idade, entre as que destacan saídas a parques acuáticos ou noites de convivencia.
Pola súa banda, os campamentos en Allariz permitirán ás persoas participantes vivir unha experiencia máis inmersiva en contacto coa natureza. Segundo explicou Silvent, esta modalidade busca “reforzar valores como a autonomía, o traballo en equipo e a igualdade”, nun entorno que favorece a convivencia e o aprendizaxe compartido.
As bases completas do programa publicaranse o 20 de abril, coincidindo coa apertura do proceso informativo. A preinscrición poderá formalizarse a través da sede electrónica municipal, no Rexistro do Concello ou de maneira presencial na Casa da Xuventude.
Unha vez pechado o prazo, faranse públicas as listaxes provisionais de persoas admitidas, así como aquelas solicitudes que precisen ser emendadas. Establecerase un período de dez días hábiles para a corrección de erros ou a achega de documentación adicional. De non realizar este trámite, entenderase que a persoa interesada renuncia á praza solicitada.
Posteriormente, daranse a coñecer as listaxes definitivas, xunto coa lista de agarda e o prazo para formalizar a matrícula e efectuar o pagamento das taxas correspondentes. Toda esta información estará dispoñible tanto no taboleiro de anuncios municipal como na sede electrónica.
Para resolver dúbidas ou ampliar información, o Concello pon á disposición da cidadanía a Casa da Xuventude e o teléfono 982 12 98 89, co obxectivo de facilitar o acceso a un programa que cada verán conta cunha alta participación.