Reclaman reparacións urxentes en varias vías de Covas polo seu estado de deterioro
O BNG de Viveiro vén de reclamar ao goberno municipal unha intervención urxente nas estradas e camiños dos barrios de As Congostras, Alvarelle e O Pedregal, na parroquia de Covas, tras recoller as demandas da veciñanza polo mal estado das vías públicas.
A portavoz municipal nacionalista, Iria Cotelo, visitou recentemente a zona acompañada polos concelleiros Seve Salgueiro e Carmen Mariño. Durante o percorrido, residentes destes núcleos amosáronlles directamente os puntos máis afectados e trasladáronlles a súa preocupación polo deterioro acumulado do pavimento.
Segundo indicou a formación, os problemas son especialmente visibles na estrada que vai desde o Camiño de Santo Albite, atravesa Alvarelle e o camiño do cemiterio, e continúa ata O Pedregal. Nalgúns treitos, aseguran, existen fendas e danos importantes que xa terían provocado avarías en vehículos e mesmo a caída dunha veciña.
Cotelo considera que a situación require unha actuación integral e inmediata para garantir a seguridade das persoas que transitan por estas vías. A portavoz do BNG sostén que o estado actual da zona evidencia unha falta de mantemento e reclama ao Concello que interveña 'con responsabilidade e celeridade'.
A veciñanza iniciou ademais unha recollida de sinaturas para pedir unha solución ao goberno local. O BNG apoia esta iniciativa e xa levou estas demandas ao pleno ordinario de maio.
A formación nacionalista insiste en que os barrios periféricos e o rural deben recibir a mesma atención que o resto do municipio. Por iso, pide a posta en marcha dun Plan de mantemento de estradas municipais que permita anticiparse ao deterioro das vías e evitar situacións de abandono como as denunciadas en Covas.