Portos de Galicia e o Concello de Cervo avanzan nunha folla de ruta para mellorar o porto de San Cibrao
A presidenta de Portos de Galicia, Natalia Botana, e a alcaldesa de Cervo, Dolores García, mantiveron unha reunión de traballo para analizar as actuacións prioritarias que se prevén desenvolver no porto de San Cibrao. O encontro serviu para reforzar a colaboración entre ambas administracións e establecer as bases dunha coordinación que permita avanzar na mellora das infraestruturas portuarias do municipio.
Durante a xuntanza, as dúas responsables abordaron distintas iniciativas encamiñadas a modernizar o recinto portuario e incrementar a calidade dos servizos que presta. Entre as cuestións tratadas figuraron posibles actuacións nas infraestruturas viarias e nos inmobles vinculados á actividade do porto, co obxectivo de optimizar o seu funcionamento e responder ás necesidades actuais.
Botana e García coincidiron na importancia de manter unha liña de traballo conxunta que facilite a execución de novos proxectos e permita continuar mellorando un espazo estratéxico para o municipio. Neste sentido, ambas administracións destacaron o clima de colaboración existente e expresaron o seu compromiso de seguir coordinando esforzos para garantir a conservación das instalacións actuais e planificar futuros investimentos que contribúan ao desenvolvemento do porto de San Cibrao.