Ourol impulsa un obradoiro para promover o empoderamento feminino e previr a violencia de xénero
O Concello de Ourol continúa desenvolvendo as actuacións previstas no seu III Plan de Igualdade 2025-2028 coa organización do obradoiro "Con Voz Propia", unha iniciativa centrada no empoderamento das mulleres, a promoción da igualdade e a prevención da violencia de xénero.
A actividade, organizada en colaboración coa Asociación de Mulleres en Igualdade BUMEI, terá lugar o vindeiro 25 de agosto, entre as 11.00 e as 12.30 horas, no edificio multiusos do municipio. O obradoiro está dirixido ás mulleres de Ourol e concíbese como un espazo de encontro, diálogo e participación no que se abordarán cuestións relacionadas coa autoestima, o fortalecemento persoal e a identificación de situacións de desigualdade e violencia machista.
Esta proposta forma parte das accións impulsadas polo Concello para avanzar cara a unha igualdade efectiva entre mulleres e homes, un dos obxectivos estratéxicos recollidos no actual plan municipal. A través deste tipo de iniciativas preténdese ofrecer ferramentas que contribúan a reforzar a autonomía persoal das participantes, fomentar relacións igualitarias e promover unha maior sensibilización fronte ás distintas manifestacións da violencia de xénero.
Desde o Concello destacan que a formación e a prevención constitúen piares fundamentais para construír unha sociedade máis xusta e libre de violencias, polo que animan ás veciñas a participar nesta actividade.
As persoas interesadas poden formalizar a súa inscrición no Departamento de Servizos Sociais do Concello de Ourol, onde tamén recibirán información adicional sobre o desenvolvemento do obradoiro.