Os Troitas Bravas, da Pontenova, seguen á cabeza da liga de billarda tralo I Aberto Villa de Castropol
Por Daniel Rodríguez Saavedra da Asociación O Varal.
Por primeira vez, a LNB NorLeste celebra unha xornada de liga en terras Asturianas, foi en Castropol, onde o Concello se involucrou e deu todo tipo de facilidades para a realización do I Aberto Villa de Castropol.
Foi unha exemplar organización dos Troitas Bravas, que amosan unha vez máis ser uns campións dentro e fora da competición, habilitando seis campos perfectamente acondicionados e marcados, dous deles para adestramento e catro para competir.
As pésimas previsións de mal tempo fixeron recuar a moitos dos habituais. Aínda así a participación foi máis da agardada (50 homes, 8 donas e 5 cativos) e a chuvia respetounos. So un vento racheado incomodou os palanadores en liza.
Charli, o zurdo de ouro de Carabullo, non atopou resistencia no seu grupo e impúxose cun pleno de 25 puntos para gañar a xornada e consolidar o primeiro posto na xeral.
Mark, trocou os alisios canarios en forte vendaval. Acadou o segundo chanzo e deu un bo empurrón para levantar con 24 puntos ao Madia Leva ao segundo caixón. E terceiro foi Luis con 23 puntos redondeando unha xornada gloriosa de Troitas Bravas, que foron os gañadores por equipos e tiveron representación en todos os podios.
Os so catro compoñentes que presentou Billarda Verde, non flaquearon e foron quen de acadar o terceiro posto por equipos.
En donas, Sandra de Troitas Bravas, tivo unha moi boa xornada e colouse como segunda entre as Billardeiras Musicais, Geni e Aroa, que foron primeira e terceira respectivamente.
En infantís, os cracks Mateu e Diego son un seguro para Madia Leva e dominaron por diante das irmás Antía e Alba de Troitas Bravas, que compartiron o terceiro posto.
Don J. Antonio Martínez Rodríguez, Antón, concelleiro de deportes de Castropol, participou activamente na xordada e amosou moi boas maneiras zoupándolle a billarda. Xa no remate foi quen fixo a entrega dos agasallos os gañadores do aberto.
A liga regular retómase o dia 5 de febreiro en Riotorto mais o vindeiro sábado 14 deste mes xogarase en Castro de Riberas de Lea o Aberto Galiña de Mos.
As clasificacións logo desta xornada quedan deste xeito:
Individual:
- Charli (Carabullo) 144 p
- David Navallo (Troitas Bravas) 129 p.
- Manu Caldeiro (Billarda Verde) 126 p.
Donas:
- Aroa (Billardeiros Musicais) 97 p.
- Geni (Billardeiros Musicais) 90 p.
- Irea (Carabullo) 64 p.
Equipos:
- Troitas Bravas (A Pontenova) 539 p.
- Carabullo (Ponte de Outeiro) 504 p.
- Billardeiros Musicais (Ribadeo) 501 p