Os quebracabezas poñerán a proba a rapidez e o enxeño dos participantes en Sante
Sante volverá reunir aos afeccionados aos quebracabezas coa celebración dunha nova edición dun concurso que chega este ano á súa cuarta convocatoria. O IV Concurso de Quebracabezas Memorial Alba Rego Rodríguez desenvolverase o domingo 27 de setembro no polideportivo desta parroquia de Trabada.
A xornada abrirase ás 10.00 horas coa competición por parellas. Os participantes nesta modalidade deberán completar un quebracabezas de 500 pezas, poñendo a proba a súa capacidade de concentración, coordinación e rapidez.
Dúas horas máis tarde, ás 12.00, será a quenda da categoría por equipos. Neste caso, o reto aumentará ata as 1.000 pezas e o traballo conxunto será fundamental para conseguir completar o quebracabezas.
O prezo da inscrición será de 25 euros por parella e de 36 euros para os equipos. As prazas dispoñibles son limitadas e as persoas interesadas poden solicitar máis información a través do correo electrónico hola@doctorpanush.com.
A competición mantén nesta cuarta edición a súa vertente de homenaxe a Alba Rego Rodríguez, cuxo nome acompaña novamente unha cita que busca combinar desafío, diversión e convivencia entre persoas cunha afección común.
Dr. Panush encárgase da organización, coa colaboración da Asociación de Veciños San Julián de Sante e da World Jigsaw Puzzle Federation e o patrocinio de Ravensburger.