Os Premios Son Muller celebrarán a súa novena edición o 11 de decembro en Mondoñedo
Mondoñedo acollerá o vindeiro 11 de decembro a gala de entrega da novena edición dos Premios Son Muller, unha iniciativa promovida pola Asociación de Mulleres Empresarias da Provincia de Lugo (AELU) para recoñecer o emprendemento e o liderado feminino no ámbito empresarial. O acto celebrarase ás 19.00 horas no Auditorio Municipal Pascual Veiga, despois de que o xurado dea a coñecer o seu fallo o día 4.
O prazo para presentar candidaturas abriu este martes, 3 de novembro, e permanecerá dispoñible ata o día 24 deste mes. Os galardóns distribúense en tres modalidades: Son Emprendedora, destinada a proxectos con ata 42 meses de actividade; Son Empresaria, para negocios que superen ese período, e Son Empresaria Rural, dirixida especificamente a iniciativas asentadas no medio rural.
Cada categoría contará con tres recoñecementos económicos, dotados con 1.500, 700 e 300 euros, respectivamente, ademais doutras distincións. As bases e o formulario de inscrición poden consultarse na páxina web www.empresariaslugo.org.
A presentación desta nova convocatoria tivo lugar na Praza da Catedral de Mondoñedo, nun acto no que participou o deputado de Medio Ambiente da Deputación de Lugo, Carlos López, quen destacou a colaboración da institución provincial, que achega 3.500 euros para apoiar a iniciativa. O representante provincial incidiu na importancia de impulsar proxectos que contribúan a xerar emprego, manter servizos e crear oportunidades nos municipios, especialmente nos do interior.
López tamén puxo o foco no papel das mulleres que promoven negocios e iniciativas económicas, así como na necesidade de visibilizar o seu traballo e recoñecer a súa contribución ao desenvolvemento da provincia. Na presentación participou tamén o director territorial da Consellería de Política Social e Igualdade en Lugo, Óscar Viñas, en representación da Xunta de Galicia, que colabora coa organización dos premios.
AELU acumula máis de 36 anos de traxectoria na promoción do emprendemento feminino e na defensa da participación das mulleres na actividade económica. Con esta novena edición, a asociación mantén o seu obxectivo de dar visibilidade aos proxectos empresariais impulsados por mulleres en toda a provincia, tanto no ámbito urbano como no rural.