O xornalista viveirense Anxo Rodríguez será o pregoeiro da Semana Santa 2026
O xornalista viveirense José Ángel Rodríguez Méndez, coñecido profesionalmente como Anxo Rodríguez, será o encargado de pronunciar o pregón da Semana Santa de Viveiro 2026. O acto celebrarase o vindeiro 28 de marzo no Teatro Pastor Díaz, nunha cita que marcará o inicio simbólico dunha das celebracións relixiosas máis emblemáticas da vila.
Anxo Rodríguez conta cunha ampla e recoñecida traxectoria nos medios de comunicación galegos, vencellada especialmente á Televisión de Galicia. Ao longo da súa carreira exerceu como redactor da canle pública autonómica e dirixiu os informativos diarios tanto do mediodía como da tarde en distintas etapas. Entre os anos 2008 e 2010 estivo á fronte do programa Parlamento, centrado na actualidade política galega.
Desde o ano 2010 é o responsable de Vivir o Mar, un espazo de referencia dedicado ao sector pesqueiro e marisqueiro, no que se abordan de maneira divulgativa e rigorosa as cuestións relacionadas co mundo do mar, un ámbito estreitamente ligado á identidade de Viveiro e da Mariña lucense.
Máis alá da súa faceta profesional, o pregoeiro mantén unha fonda relación persoal coa Semana Santa viveirense. Durante anos participou activamente nas procesións como portador de distintos pasos, vivindo desde dentro unha tradición que forma parte esencial da historia e da vida social da localidade. A súa designación como pregoeiro supón, así, un recoñecemento tanto á súa traxectoria xornalística como ao seu compromiso coa Semana Santa de Viveiro.