O viveirense Santi Chao cruza os Alpes en bicicleta para visibilizar a doazón de órganos
O viveirense Santi Chao conseguiu un novo reto, cruzar a cordilleira dos Alpes de Este a Oeste en bicicleta, o obxectivo do seu reto é dar visibilidade á importancia de ser doante de órganos, tecidos e medula ósea para salvar vidas.
Dende o pasado 2 de xullo, acompañado por catro amigos, Santi Chao realiza unha travesía duns 1.800 quilómetros e cun desnivel positivo de máis de 30.000 metros, para ascender a 26 portos de montaña en 16 etapas, atravesando cinco países.
A travesía partiu de Trieste, en Italia, e finalizará na cidade francesa de Niza o vindeiro 18 de xullo. Unha nova fazaña que o viverense asume 20 anos despois de recibir un transplante de corazón.
Este novo reto, que se suma aos moitos realizados polo deportista viveirense dende 2011, serve para dar visibilidade e normalidade a este tema, promovendo as doazóns e demostrando que a práctica deportiva a este nivel é posible despois dun transplante.
Onte, Santi e os seus compañeiros estaban en Bourg-Saint-Maurice, na duodécima etapa da súa travesía. Tanto no seu Facebook (Santi Chao) como no seu perfil de Instagram (santichaotwohearts), o deportista viveirense publica crónicas das diferentes xornadas e explica os detalles deste reto, baixo o cancelo #transalpinatransplantado.
