O Vicedo achégase aos tres anos de protestas mensuais para reclamar médicos no centro de saúde
A veciñanza do Vicedo volveu mobilizarse este domingo para reclamar máis médicos e servizos no centro de saúde, unha demanda que está a piques de cumprir tres anos de protestas ininterrompidas. Desde o inicio das mobilizacións, os participantes veñen concentrándose todos os meses para esixir que se cubran as dúas prazas médicas e evitar que o municipio dependa dun único facultativo.
A marcha percorreu novamente varias rúas da localidade, partindo do ambulatorio e rematando diante da Casa do Concello. Veciños e veciñas de diferentes idades sumáronse á protesta portando pancartas con mensaxes como "Médicos no Vicedo Xa" ou "O Vicedo existe, O Vicedo resiste".
Os participantes consideran que un só médico non é suficiente para cubrir as necesidades asistenciais da poboación e manteñen a súa reclamación para que as dúas prazas do centro sanitario estean cubertas.
TRES ANOS DE MOBILIZACIÓNS EN NOVEMBRO
O próximo mes de novembro cumpriranse tres anos desde que comezaron unhas protestas que, desde entón, se repetiron mes tras mes. A continuidade das mobilizacións evidencia que a veciñanza mantén intacta unha reivindicación que considera esencial para garantir unha atención sanitaria adecuada no municipio.
Entre os argumentos dos participantes está tamén a necesidade de evitar desprazamentos que consideran innecesarios fóra do Vicedo. Defenden que contar cos profesionais necesarios no centro de saúde permitiría reducir as viaxes ao Punto de Atención Continuada (PAC) de Viveiro ou ao Hospital Público da Mariña, en Burela, para recibir asistencia.
Tras case tres anos saíndo á rúa, a veciñanza continúa así reclamando unha solución a unha situación que considera insuficiente y mantén unha mensaxe clara: O Vicedo necesita que se cubran as dúas prazas médicas do seu centro de saúde.