O Vicedo abre o prazo de inscrición para a ludoteca de verán destinada á infancia do municipio
O Concello do Vicedo vén de anunciar a apertura do prazo de inscrición para participar na ludoteca de verán, unha iniciativa pensada para favorecer a conciliación familiar durante os meses estivais e ofrecer actividades de lecer á rapazada do municipio.
As solicitudes poderán presentarse entre o 15 de maio e o 8 de xuño. O servizo desenvolverase entre o 22 de xuño e o 4 de setembro e estará destinado a nenos e nenas nacidos entre os anos 2010 e 2023, ambos incluídos.
Desde o goberno local explican que as persoas interesadas deberán acudir ás oficinas dos servizos sociais municipais, onde se lles facilitará a documentación necesaria para formalizar a inscrición. Entre os documentos requiridos figuran o DNI dos pais ou titores, a tarxeta sanitaria do menor, a declaración da renda e o certificado de empadroamento.
O Concello tamén indica que se poderá presentar outra documentación complementaria nos casos que permitan obter maior puntuación no proceso, como situacións relacionadas con familias monoparentais ou vítimas de violencia de xénero.
Con esta proposta, o Vicedo busca ofrecer unha alternativa educativa e de ocio durante as vacacións escolares, ao tempo que facilita ás familias a organización diaria durante o período estival.