A cita, que conta coa colaboración do A.D. Río Ouro, será o sábado 14 de setembro
O municipio do Valadouro comeza a tempada deportiva cun torneo de fútbol 8 organizado polo Goberno local. A cita, que conta coa colaboración do A.D. Río Ouro, será o sábado 14 de setembro no Campo do Árbol. Na competición poderán participar as categorías prebenxamín (2018-2017), benxamín (2016-2015) e alevín (2014-2013). O torneo conta coa coalboración tamén da área de Deportes da Deputación de Lugo.
O fútbol 8 xógase segundo as regras do fútbol en formato reducido, normalmente cun equipo de oito xogadores por lado en lugar dos once tradicionais do fútbol 11 e é especialmente popular en categorías xuvenís e na formación de xogadores, xa que permite aos mozos mellorar as súas habilidades técnicas e tácticas nun espazo reducido e con menos xogadores.
O deputado de Mocidade Daniel García, o concelleiro de Deportes do Valadouro Eliseo Teijeiro, e representantes do club organizador presentaron o torneo, que reunirá máis dunha vintena de equipos das categorías alevín, benxamín e prebenxamín de clubs de Lugo e Asturias e que será un dos primeiros en celebrarse na provincia tras o parón da actividade competitiva e de adestramentos que supón o verán.
O deputado Daniel García valorou “a colaboración entre o concello e ao club para organizar este evento e para ofrecer ás nenas e nenos do concello alternativas de ocio saudable ao longo do ano” e incidiu na “relevancia do deporte como motor de dinamizacion social, especialmente nos concellos pequenos”. O concelleiro do Valadouro Eliseo Teijeiro explicou “a aposta do Goberno local por reforzar a actividade deportiva e revitalizar as instalacions do Árbol coa celebración de eventos como este torneo, que traen xente ao concello e poñen en valor o traballo da AD Río Ouro”. A Vicepresidencia da Deputación colabora na organización do evento, reforzando o apoio que ofrece ao club valadourés e ao tecido deportivo a través das axudas de concorrencia para entidades deportivas.
