O Teatro Pastor Díaz afronta o último trimestre do ano con teatro, circo, música, humor e maxia
O Teatro Pastor Díaz de Viveiro contará cunha intensa programación cultural durante os meses de outubro, novembro e decembro, cunha axenda que combinará teatro, circo, música, humor e maxia. O calendario reunirá propostas para diferentes idades e contará coa presenza de compañías e artistas galegos como Carlos Blanco, Teatro ó Cubo, Pistacatro, Contraproducións, Ártika Teatro, Ibuprofeno Teatro ou Ítaca Teatro.
A concelleira de Cultura, Saray Ventura, destacou precisamente a diversidade dunha programación pensada para chegar a públicos distintos. "Quixemos preparar unha programación variada, con propostas para todos os públicos e diferentes disciplinas artísticas", explicou. Así, durante os tres últimos meses do ano, o Pastor Díaz combinará espectáculos familiares con outros dirixidos especificamente ao público adulto.
Cinco sábados de cultura en outubro
Outubro será o mes con maior número de citas, cun espectáculo cada sábado. A programación abrirase o día 3, ás 18.00 horas, con 'Voo', de Teatro ó Cubo, unha proposta de teatro físico e manipulación de obxectos destinada ao público infantil e familiar.
O día 10, ás 20.30 horas, chegará ao escenario Carlos Blanco con 'A penúltima', un espectáculo de 70 minutos no que o humorista e narrador mesturará historias novas e outras xa coñecidas co seu particular xeito de contar.
O novo circo tomará o relevo o sábado 17, ás 18.00 horas, con 'Sen Patrón', de Pistacatro. Malabares, equilibrios e humor darán forma a unha función recomendada para espectadores de entre 6 e 99 anos.
A literatura galega terá o seu espazo o 24 de outubro, ás 20.30 horas, coa adaptación teatral de 'Memorias dun neno labrego', a emblemática obra de Xosé Neira Vilas. Contraproducións levará ás táboas este clásico nunha montaxe dirixida por Cándido Pazó.
O Samaín pechará a programación mensual o día 31, ás 18.00 horas, con 'Quen dixo medo?', de Barafunda. A proposta, pensada para nenos e nenas de entre 3 e 12 anos, combinará xogos, música e baile nun ambiente protagonizado polos espíritos propios destas datas.
Teatro, musical e Santa Icía en novembro
A actividade continuará o 7 de novembro, ás 18.00 horas, con 'O libro da selva. O musical', de Ártika Teatro. O clásico de Rudyard Kipling transformarase nun espectáculo familiar integramente en galego e con música en directo.
Unha semana máis tarde, o día 14 ás 20.30 horas, Ibuprofeno Teatro presentará 'Bio construción', unha peza contemporánea para adultos que recorrerá ao surrealismo e ao absurdo para abordar asuntos como o fracaso, a crise climática, o mercado inmobiliario, o amor e o propio mundo teatral.
A música centrará a xornada do 21 de novembro coa celebración de Santa Icía. A Banda de Música O Landro interpretará 'Os soños na gaiola' en dúas sesións, programadas para as 18.30 e as 20.30 horas.
Nadal con teatro, música e maxia
O último mes do ano abrirá a súa programación o 12 de decembro, ás 20.30 horas, con 'Profetas', de Ítaca Teatro. A obra, destinada ao público adulto, parte do reencontro dunha antiga parella para reflexionar sobre o amor, a creación e as fronteiras entre realidade e ficción. O texto de Ernesto Is foi recoñecido co 16º Premio Abrente de textos teatrais da MIT de Ribadavia.
O 22 de decembro, ás 20.30 horas, a Banda de Música O Landro volverá ao escenario viveirense co seu Concerto de Nadal ao Estilo Vienés.
O broche á programación chegará o día 28, ás 18.00 horas, con 'Magic Mateo Show', unha función familiar na que a maxia se mesturará co humor e coa participación directa dos espectadores.
As entradas poderán reservarse de luns a xoves, entre as 9.00 e as 14.00 horas, a través do teléfono 982 560 162 ou do correo electrónico cultura@viveiro.gal. Tamén se poderán adquirir na taquilla do Teatro Pastor Díaz desde unha hora antes do inicio de cada función.