O Surf consolídase nas Escolas Deportivas Municipais de Barreiros
Por quinto ano consecutivo, o Surf volve formar parte do programa das Escolas Deportivas Municipais de Barreiros. Esta semana, o concelleiro de Deportes, Daniel García, reuniuse con Luís Fernández, responsable da academia local LA Academia del Surf, para presentar oficialmente a Escola Municipal de Surf da tempada 2025/26, que dará comezo o vindeiro 8 de abril na Praia de Coto, sede da actividade.
A Escola de Surf é unha das seis propostas que se inclúen no programa deportivo municipal e que, ano tras ano, logra atraer a un maior número de nenos e nenas, non só de Barreiros senón tamén de localidades veciñas. O concelleiro destacou que “ofertar esta actividade é unha maneira de apostar polo deporte e fomentar a súa práctica dende a base, aproveitando que Barreiros conta con praias de riqueza incalculable para o surf”.
As inscricións xa están abertas para todas as crianzas nadas entre os anos 2009 e 2017, e deberán formalizarse nas oficinas municipais do Concello. Esta iniciativa busca non só promover hábitos saudables e a actividade física entre os máis novos, senón tamén poñer en valor os recursos naturais do municipio e consolidar o surf como unha actividade deportiva de referencia na zona.
Co regreso desta escola, Barreiros reforza a súa aposta polo deporte base e ofrece ás familias unha opción educativa e recreativa que combina natureza, diversión e aprendizaxe, mantendo viva a tradición de aproveitar as praias locais como espazos de formación deportiva.