O sector pesqueiro de Celeiro confía en que o Resurrection Fest se desenvolva sen afectar á actividade do porto
As entidades representativas do sector pesqueiro de Celeiro agardan que a celebración do Resurrection Fest 2026 transcorra con normalidade e sen interferencias na actividade diaria do porto, despois de que nos últimos meses se impulsasen diferentes medidas destinadas a evitar os problemas rexistrados en edicións anteriores.
Co obxectivo de compatibilizar o desenvolvemento do festival co funcionamento das instalacións portuarias, o sector trasladou con antelación a súa preocupación ás administracións e organismos competentes. Nun encontro celebrado o pasado 22 de maio en Celeiro analizáronse distintas propostas para preservar a operatividade do porto durante os días do evento, valorándose positivamente a implantación dun sistema de control de accesos e acreditacións.
Como resultado deste traballo, Portos de Galicia elaborou un plan específico que establece restricións en diferentes espazos portuarios. Entre as medidas previstas figuran a limitación de accesos, a prohibición de aparcar e acampar nos peiraos e a reserva de determinadas zonas para uso exclusivo da actividade pesqueira. Como novidade nesta edición, tamén se impedirá o estacionamento nas áreas portuarias destinadas aos profesionais do mar debidamente acreditados.
Desde o sector lembran que este tipo de regulacións xa se aplican con éxito noutros eventos multitudinarios celebrados en Galicia, permitindo conciliar a seguridade, a mobilidade e o normal desenvolvemento da actividade económica. Neste sentido, consideran que o continuo crecemento do Resurrection Fest fai necesario adoptar medidas preventivas que garantan unha convivencia adecuada entre o festival e o funcionamento do porto.
As organizacións pesqueiras subliñan que a actividade extractiva constitúe un servizo esencial e prioritario que non debe verse condicionado por eventos de carácter lúdico. Ao mesmo tempo, amosan a súa confianza en que a colaboración entre administracións, organización e usuarios permita que tanto o festival como o traballo diario no porto se desenvolvan sen incidencias.
Ademais, fan un chamamento ás persoas asistentes para que respecten a normativa establecida e eviten acceder con vehículos ou autocaravanas aos peiraos e ás zonas restrinxidas, tal e como recollen as indicacións da organización do festival. As entidades sinalan tamén que máis de 200 profesionais do sector pesqueiro e actividades vinculadas xa pasaron polas súas oficinas para tramitar as acreditacións e autorizacións necesarias que facilitarán o acceso ás instalacións portuarias durante os días do evento.