O responsable do BNG na comarca da Mariña valora positivamente os resultados acadados nas eleccións europeas
O BNG mariñao fixo valoración dos resultados obtidos este pasado domingo, que "a nivel galego son os mellores en 20 anos nunhas eleccións europeas, verificándose así que o BNG é unha forza política á alza que, proceso electoral tras proceso electoral incrementa o seu apoio social", explican.
Concretamente, din que na Mariña o BNG medrou tamén na totalidade dos municipios, "consolidando así a súa presenza e ascenso na comarca nos sucesivos procesos electorais".
En palabras do responsable comarcal Antonio Veiga, “a consolidación do escano do BNG en Europa supón unha moi boa nova para a comarca, e para todos os sectores produtivos e económicos que a cotío sofren as consecuencias de moitas políticas e directrices e normas administrativas emanadas da UE lesivas para os seus intereses e para os da comarca, pois Ana Miranda foi e vai seguir sendo a voz que se alce en defensa deles”.
Desde o BNG recordaron a implicación de Ana Miranda coa comarca e a súa presenza continuada nela tanto en mobilizacións ao lado do sector frente a proxectos prexudiciais para os sectores produtivos coma a eólica mariña, ou reuníndose cos sectores agrogandeiro e pesqueiro analizando a PAC ou a PPC.
BNG DE RIBADEO
Concretamente, o BNG de Ribadeo celebrou que "Galicia conte con voz propia en Bruxelas" e agradece o apoio recibido do pobo, "que viu en Ana Miranda unha firme defensora dos nosos intereses en Europa".
"Moita xente viu na nosa candidatura, e na nosa organización, un equipo serio e responsábel que pon Galiza por diante de todo e mantén as mesmas posicións aquí, en Madrid ou en Bruxelas. Grazas, veciñas e veciños, por confiardes en nós, por depositar a papeleta do BNG nas urnas este domingo 9 de xuño. Grazas por nos dardes alento co voso apoio para seguirmos traballando polo noso país, por cada un dos nosos concellos", aegumentaron.
Así, din que en Ribadeo "seguimos asumindo o papel que nos outorgastes hai un ano e cada vez queda máis claro que temos máis capacidade de influír nós na xestión correcta do concello que o propio equipo de Goberno".