O punto limpo móbil continuará o seu percorrido por Viveiro con novas paradas ata outubro
O Concello de Viveiro continúa desenvolvendo o calendario do punto limpo móbil de 2026, un servizo itinerante que percorre as distintas parroquias do municipio para facilitar á veciñanza a correcta xestión dos residuos domésticos especiais e promover hábitos de reciclaxe responsables.
A seguinte parada terá lugar en Chavín, onde o punto limpo móbil permanecerá situado xunto á igrexa ata o 15 de xullo. Posteriormente trasladarase a Vieiro, tamén xunto á igrexa, do 16 ao 30 de xullo; a Covas, no colexio, do 31 de xullo ao 14 de agosto; e a Misericordia, nas inmediacións do IES María Sarmiento, do 17 ao 31 de agosto.
O calendario continuará en setembro con dúas novas localizacións: Area, xunto á igrexa, do 1 ao 15 de setembro, e Celeiro, na Piscina Municipal, do 16 ao 30 de setembro. O percorrido finalizará en Viveiro, no aparcadoiro da Variante, onde o servizo estará dispoñible entre o 1 e o 15 de outubro.
Antes destas paradas, o punto limpo móbil xa prestou servizo en Magazos, San Andrés de Boimente, San Pedro, Galdo, Landrove e Valcarría, completando así o seu percorrido polas primeiras parroquias incluídas na programación anual.
Desde o Concello lembran que este recurso facilita a reciclaxe de residuos que non deben depositarse nos colectores convencionais, contribuíndo á protección do medio ambiente e a unha xestión máis sostible dos residuos xerados nos fogares. A administración local anima á veciñanza a facer uso deste servizo ao seu paso por cada parroquia e a colaborar no coidado da contorna mediante unha correcta separación e reciclaxe dos residuos.