O PSOE provincial reclamará á Xunta un plan para desenvolver a rede de telefonía móbil
O Grupo Socialista na Deputación de Lugo defenderá no vindeiro Pleno ordinario unha moción para instar á Xunta “a desenvolver un plan de axudas específicas para evitar o sobrecusto que estes traballos supoñen para as arcas dos pequenos concellos da provincia de Lugo”.
O Grupo Socialista na Deputación de Lugo defenderá no vindeiro Pleno ordinario, que terá lugar o martes día 29 de marzo, unha moción para reclamar á Xunta un plan para que os concellos pequenos poidan desenvolver a rede de telefonía móbil.
Concretamente a través desta proposta demandan ao Goberno Autonómico “asumir o custo de levar a acometida eléctrica ás torres de telefonía móbil nos concellos do rural ou ben desenvolver un plan de axudas específicas para evitar o sobrecusto que estes traballos supoñen para as arcas dos pequenos concellos da provincia de Lugo”.
Na iniciativa rexistrada, o PSdeG insta á Xunta de Galicia “a que cumpra os obxectivos fixados na Lei 3/2013 de Impulso e Ordenación das Infraestruturas de Telecomunicacións de Galicia, e especialmente os relativos ao desenvolvemento de infraestruturas de telecomunicación, garantía de acceso para particulares e empresas, e eliminación da fenda dixital no rural”.
Hai que lembrar que a Xunta presentou un plan de mellora de telefonía rural para o período 2022/2023 como unha acción ambiciosa que pretende mellorar o servizo de telefonía móbil en 290 entidades de poboación, mellorando a cobertura que reciben 7.000 habitantes de 65 concellos galegos. Pola contra, aseguran os socialistas, “despois de ler estes grandes titulares, comprobamos que a realidade do investimento previsto revela a cativa aposta da Xunta pola dixitalización do rural galego e lucense”.
Só 15.000 euros para a cobertura de cada núcleo
Así as cousas e segundo os datos publicados, “o investimento total desta acción apenas acada os 4,3 millóns de euros, 3,7 deles procedentes de fondos públicos. Ou o que é o mesmo, a Xunta vai dedicar só 15.000 euros á cobertura telefónica de cada núcleo de poboación”.
A Xunta convida e os concellos pagan
Polo tanto, “as contas da Xunta evidencian unha vez máis que a administración autonómica é quen convida a este proxecto, pero a quen lle toca pagar é ós concellos, coas súas limitacións orzamentarias. Porque serán os concellos os encargados de atopar as parcelas para instalar as torres de telefonía; serán os concellos os encargados de poñer as parcelas á disposición da Xunta, cos seus correspondentes accesos; e serán os concellos os que teñan que sufragar os gastos de levar a acometida eléctrica a cada unha das torres”.
Entre 60.000 e 90.000 euros por cada torre
Tendo en conta que as torres poden estar asentadas en parcelas de titularidade privada, o custo total de cada torre, para os concellos, pode rondar entre os 60.000 e os 90.000 euros. Como se ve, a Xunta, non só incumpre os obxectivos fixados pola súa propia Lei 3/2013 de Impulso e Ordenación das Infraestruturas de Telecomunicacións de Galicia, “senón que pretende botar sobre as arcas municipais a meirande parte do investimento necesario para impulsar a telefonía no rural lucense”, critican os socialistas.
Por todo isto, “o Grupo Provincial Socialista reitera o seu compromiso coa dotación de servizos básicos para o conxunto da poboación e coa necesidade de contar cunha rede de telefonía móbil e datos de calidade que dea servizo ó conxunto do territorio da provincia”, remarcan.
O Partido Popular pola súa conta defenderá tamén dúas mocións, a primeira sobre esixir un plan de medidas para minimizar as consecuencias económicas da invasión de Ucraína. Ademais piden outro plan de apoio aos concellos ante o incremento dos gastos.
Así, na primeira proposta de acordo do PP solicitan ao Pleno da Deputación instan a demandar ao Goberno de Epaña que faga efectivo o compromiso de poñer en marcha medidas urxentes para minimizar as consecuencias socioeconómicas nas empresas e nos cidadáns trala invasión de Ucraína.
Así propoñen a baixada de impostos que gravan a electricidade, gas, gasolina e gasóleo, así como medidas específicas para os sectores máis afectados, como son o transporte, a industrias electrotensivas, pesca, gandaría e turismo. Tamén piden rectificar a polígica enerxética apostando por unha "transición planificada, proporcional e xusta".
Tamén queren reverter o incremento xeralizado de impostos, descartando a implantación de peaxes nas autovías "que suporían novas cargas para as familias e os sectores productivos esenciais".
Así mesmo, solicitan que se analicen os sectores máis afectados pola guerra e que se impulsen as medidas necesarias dende a Unión Europea para mitigar estas consecuencias.
O Pleno da Deputación pedirá si se aproba tamén un plan de axudas directas aos sectores agrogandeiro, pesqueiro e do transporte.
Por outra banda, o PP pedirá tamén que se aprobe un plan económico complementario para apoios aos pequenos e medianos concellos da provincia ante o aumento esaxerado do gasto corrente producido polo incremento do prezo da luz, dos combustibles, e dos subministros de materiais para o que propoñen un orzamento de 3,5 millóns de euros.