O PSOE de Viveiro acusa a alcaldesa de utilizar vídeos institucionais para facer propaganda partidista
O PSOE de Viveiro acusa o goberno municipal de utilizar os vídeos institucionais financiados con fondos públicos para favorecer a imaxe da alcaldesa e do Partido Popular. A formación socialista considera que estes contidos deixan fóra de maneira sistemática aos representantes da oposición e incorporan declaracións con valoracións políticas que, ao seu xuízo, non corresponden á comunicación institucional.
Os socialistas distinguen entre informar sobre a actividade do Concello e empregar os medios municipais para difundir mensaxes partidistas. Neste sentido, sosteñen que os vídeos ofrecen unha visión incompleta da actividade pública ao non reflectir a participación dos grupos da oposición nos actos municipais.
O PSOE lembra que os representantes da oposición tamén forman parte da Corporación e representan unha parte da cidadanía, polo que considera que a súa ausencia nestes contidos transmite unha imaxe da institución centrada unicamente no equipo de goberno.
A formación cuestiona tamén a inclusión de declaracións da alcaldesa con valoracións políticas e defende que, se a intención é facer propaganda do PP, deberían utilizarse as canles propias do partido, e non recursos económicos municipais.
Os socialistas inciden na importancia de garantir a neutralidade institucional, especialmente nun período electoral, no que consideran que debe extremarse o coidado na utilización dos medios públicos.
Por iso, o PSOE de Viveiro reclama información sobre o custo dos vídeos, os criterios seguidos para a súa edición e as medidas adoptadas para garantir o respecto á pluralidade política da Corporación municipal.