O PSdeG do Valadouro reclama melloras nas estradas provinciais e pide avances na LU-0101
Representantes do PSdeG do Valadouro mantiveron un encontro coa presidenta da Deputación de Lugo, Carmela López, no que lle trasladaron a necesidade de reforzar os investimentos e as actuacións de conservación nas estradas provinciais que discorren polo municipio.
Durante a reunión, os socialistas expuxeron diferentes demandas relacionadas coa mellora da rede viaria, ao considerar prioritario garantir unhas comunicacións en condicións axeitadas para a veciñanza e para os usuarios habituais destas vías.
Un dos asuntos centrais do encontro foi a situación da estrada LU-0101, que enlaza Ferreira con Abadín atravesando as parroquias de Santa Cruz, Recaré, Frexulfe e O Cadramón. O PSdeG solicitou información sobre o estado da actuación prevista tras o desprendemento rexistrado a comezos deste ano e interesouse polos prazos para a súa execución.
Segundo indicaron os representantes socialistas, durante a reunión informóuselles de que xa existe un proxecto redactado e dotado de financiamento para acometer a intervención, que se atopa actualmente en fase de licitación.
Ao remate do encontro, o PSdeG do Valadouro agradeceu a disposición mostrada pola Deputación e pola súa presidenta para escoitar as demandas formuladas, así como os compromisos adquiridos co obxectivo de impulsar actuacións que contribúan a mellorar as infraestruturas viarias e a calidade de vida da veciñanza do municipio.