Política

Os socialistas consideran que o recinto actual non responde ás necesidades deportivas e culturais do municipio e propoñen estudar a súa construción na zona norte do parque

O Grupo Municipal Socialista de Xove reclama ao goberno local do PP que comece a planificar un novo pavillón multiusos ante as limitacións da instalación actual. A formación trasladou esta demanda ao último pleno municipal mediante un rogo no que defende a necesidade de contar cun espazo adaptado á celebración de competicións deportivas, espectáculos e actividades sociais e culturais.

Os socialistas lembran que o edificio actual foi deseñado nos anos oitenta como praza de abastos e que as reformas posteriores non solucionaron as súas deficiencias. Ao seu xuízo, as características do recinto dificultan que poida responder ás necesidades actuais das entidades e da veciñanza, polo que consideran necesario impulsar unha nova infraestrutura.

A proposta do PSdeG contempla como posible localización a zona norte do parque actual, aínda que esta opción requiriría adquirir terreos. A formación defende que o futuro equipamento permita recuperar o protagonismo que Xove chegou a ter no ámbito deportivo e cultural, con espectáculos de relevancia e campionatos de fútbol sala que contribuíron á proxección do municipio.

No plano político, os socialistas critican a resposta do alcalde, Salgueiro, durante o debate plenario. Segundo relatan, o rexedor cualificou o pavillón como "o mellor do mundo" e atribuíu parte das deficiencias aos empregados. O PSdeG considera esta reacción desconsiderada e reclama ao goberno municipal que asuma a responsabilidade sobre o mantemento dos edificios públicos e a planificación dos investimentos.

A formación tamén cuestiona que o alcalde aludise a un custo de catro millóns de euros para o proxecto sen expor alternativas para facelo realidade. Fronte a esta situación, propón buscar financiamento doutras administracións e marca como obxectivo que os recursos externos cubran, cando menos, o 70% do investimento, co fin de reducir o desembolso municipal.

Como exemplo da colaboración institucional que defende, o grupo socialista cita as xestións realizadas para conseguir un convenio coa Deputación de Lugo destinado á reparación de estradas do municipio.

O PSdeG insiste en que a creación dun novo pavillón permitiría ampliar a programación e mellorar as condicións para as persoas usuarias e as entidades locais. Por iso, pide ao executivo do PP que atenda o rogo e dea os primeiros pasos para definir o proxecto e explorar as vías de financiamento.

"Xove necesita recuperar o seu estatus como referente en cultura e deporte", sostén a formación, que vincula esta demanda co seu obxectivo de impulsar un cambio político nas eleccións municipais de maio de 2027.