O PSdeG de Xove denuncia máis de vinte anos sen políticas de vivenda e acusa ao PP de inacción
O Grupo Municipal Socialista de Xove puxo o foco na situación da vivenda no municipio, denunciando a ausencia de políticas públicas neste ámbito durante máis de dúas décadas e responsabilizando ao goberno local do Partido Popular de non ter impulsado iniciativas que permitan afrontar un problema que cualifican de estrutural.
Desde o PSdeG lembran que as últimas promocións públicas de vivenda en Xove remóntanse a finais dos anos noventa e aseguran que, desde entón, non se volveu promover ningún proxecto residencial, nin desde o ámbito público nin privado. “Levamos máis de vinte anos sen actividade construtiva en vivenda”, sinalan, incidindo na parálise do sector neste ámbito.
A formación socialista advirte de que, na actualidade, non existe unha oferta real de vivendas nin en alugueiro nin en venda, unha situación que, segundo apuntan, dificulta especialmente que a mocidade poida establecerse no municipio. Ao seu xuízo, esta carencia tamén supón un freo para o desenvolvemento económico e social de Xove.
Neste contexto, critican que o executivo local non conte cun plan municipal de vivenda nin con medidas orientadas a mobilizar solo, incentivar a construción ou promover a rehabilitación de inmobles xa existentes. Ademais, cuestionan a falta de planificación e reprochan que, cando este asunto se trata nos plenos, o alcalde se limite a afirmar que non hai solicitudes, unha resposta que consideran afastada da realidade.
Fronte a este escenario, o PSdeG insta ao goberno municipal a elaborar e poñer en marcha un plan específico que permita activar solo dispoñible, fomentar a edificación e facilitar o acceso á vivenda a prezos asumibles para a veciñanza. Tamén reclaman que o Concello aproveite as liñas de axuda e os instrumentos ofrecidos por outras administracións para incrementar a oferta residencial.
“As administracións dispoñen de ferramentas para actuar; o que falta en Xove é vontade política e capacidade de xestión para aplicalas”, conclúen desde o grupo socialista, que insiste na necesidade de situar a problemática da vivenda entre as prioridades da acción municipal.