O programa Nnabata atende en Burela 139 persoas migrantes con apoio xurídico, psicolóxico e social
O programa Nnabata pechou a súa actividade en Burela cun total de 139 persoas migrantes atendidas a través dun servizo integral de acompañamento xurídico, psicolóxico e social. A iniciativa desenvolveuse coa colaboración do Concello de Burela e Arraianas e contou co financiamento da Fundación ”la Caixa”.
Unha parte importante das consultas estivo vinculada aos procedementos administrativos. Das 139 persoas que recorreron ao programa, 111 fixérono por cuestións relacionadas co proceso de regularización, aínda que durante as atencións tamén se abordaron outras necesidades derivadas das circunstancias persoais e sociais de cada usuario.
O asesoramento permitiu prestar apoio en trámites como permisos de residencia, expedientes de asilo e refuxio ou homologacións de estudos de Bacharelato. Tamén se ofreceron indicacións para realizar preinscricións, orientación laboral e información sobre outras cuestións administrativas. Ademais, nos procesos de regularización entregouse o certificado de vulnerabilidade ás persoas que cumprían os requisitos e o precisaban.
A actuación de Nnabata non se limitou á realización ou explicación de trámites. O servizo xurídico estivo acompañado dunha atención psicolóxica e social destinada a dar resposta ás dificultades que poden aparecer durante un proceso migratorio e a facilitar o acceso aos recursos e á información necesarios para favorecer a integración na sociedade de acollida.
O tenente de alcaldesa e concelleiro de Inmigración, Mario Pillado, destacou precisamente a importancia desta vertente. Segundo explicou, estes procedementos teñen unha dimensión que vai máis alá do ámbito laboral e administrativo, xa que tamén repercuten directamente na integración social e na convivencia da comunidade burelá.
O proxecto incluíu igualmente accións informativas. O 23 de abril organizouse unha charla centrada no proceso de regularización que rexistrou unha elevada asistencia, ata o punto de ser necesario dividir a actividade en dúas sesións para atender a todas as persoas interesadas.
Desde o Concello de Burela consideran que este modelo de acompañamento permite afrontar o proceso migratorio desde unha perspectiva integral, atendendo tanto as xestións administrativas como as circunstancias persoais e sociais que poden xurdir ao longo deste percorrido.
Pillado tamén agradeceu o labor desenvolvido polo persoal municipal e polo equipo de Arraianas, especialmente ante as necesidades xeradas polo proceso de regularización extraordinaria. Esta situación obrigou, segundo sinalou, a realizar un esforzo adicional e asumir tarefas que inicialmente non estaban contempladas no financiamento do proxecto para poder responder á demanda da poboación migrante residente no municipio.