O PP provincial denuncia o risco no inicio da LU-P-2801 en Lourenzá e reclama unha solución inmediata
Os deputados do Grupo Provincial do Partido Popular, Antonio Ameijide e José María Fernández, visitaron o comezo da estrada provincial LU-P-2801, ao seu paso polo núcleo de Santo Tomé, en Lourenzá, para comprobar sobre o terreo o que cualifican como un “punto perigoso” para a circulación. Na visita estiveron acompañados polo voceiro popular no municipio, Roberto Díaz, e pola concelleira Sandra Gómez.
Segundo explicaron, neste tramo inicial da vía existe un estreitamento provocado pola proximidade dun inmoble á calzada, o que dificulta o paso simultáneo de vehículos e reduce as condicións de seguridade, especialmente para os peóns, xa que non hai beirarrúas que garantan un tránsito seguro. O grupo provincial sinala que xa recibiu diversas queixas veciñais advertindo da perigosidade deste punto, situado practicamente no quilómetro cero da estrada.
Antonio Ameijide lembrou que esta situación foi levada ao pleno da Deputación en varias ocasións, a última delas no mes de novembro de 2025. O portavoz popular criticou que desde o goberno provincial se minimizase o problema e asegurou que existen alternativas viables para desbloquear a situación. Neste sentido, indicou que, segundo lles trasladaron, os propietarios do inmoble estarían dispostos a facilitar unha cesión que permitiría ampliar a plataforma viaria e corrixir o chamado “tapón urbanístico”.
Para o PP, a solución pasa por que o executivo provincial, formado por PSOE e BNG, abra unha vía de diálogo cos titulares da vivenda co fin de acadar un acordo que faga posible mellorar a seguridade. Os populares consideran que se trata dunha actuación asumible e necesaria para evitar riscos innecesarios tanto a condutores como a peóns.
Ameijide tamén rexeitou as declaracións realizadas pola responsable provincial da área, ás que acusou de non axustarse á realidade, e insistiu en que a presenza de beirarrúas noutros puntos da rede demostra que é posible acometer melloras deste tipo cando existe vontade política.
Desde o Grupo Provincial Popular subliñan que a prioridade debe ser garantir unha rede viaria segura e en condicións adecuadas de mantemento. Por iso, instan ao goberno da Deputación a actuar con dilixencia e a eliminar aqueles puntos negros que poidan comprometer a seguridade na provincia.