O PP leva ao Senado a situación da oficina de Correos do Valadouro pola falta de persoal
Os senadores do Partido Popular pola provincia de Lugo presentaron varias preguntas no Senado para solicitar explicacións ao Goberno de Pedro Sánchez sobre a situación da oficina de Correos do Valadouro, unha iniciativa promovida a petición do alcalde do municipio, José Manuel Lamela, pola crecente preocupación veciñal ante a redución de persoal e a perda de calidade do servizo postal.
Os representantes populares José Manuel Balseiro, José Manuel Barreiro e Juan Serrano advirten de que os problemas de funcionamento de Correos están a darse de maneira xeneralizada, con especial incidencia nas zonas rurais. Segundo sinalan, os atrasos no reparto e a saturación das oficinas son consecuencia directa da falta de persoal, unha situación que afecta de forma particular aos concellos máis pequenos.
No caso do Valadouro e Alfoz, o malestar incrementouse ao coñecerse que actualmente só dous carteiros se encargan de atender todo o servizo postal destes dous municipios. Durante o pasado mes de decembro, explican, non se cubriron nin as baixas por xubilación nin as ausencias temporais do persoal de repartición, o que agravou notablemente as deficiencias no funcionamento diario.
Ante este escenario, os senadores do PP formularon preguntas para coñecer cantos traballadores ten asignados Correos nesta oficina, como evolucionou o cadro de persoal desde o ano 2018, cantos postos están realmente cubertos, cantos empregados se atopan de baixa e cantas destas ausencias non foron substituídas, así como os motivos desta situación.
O senador mariñán José Manuel Balseiro destacou que no rural o papel dos carteiros vai máis alá do reparto postal, xa que “actúan como un servizo esencial que compensa a desaparición doutros recursos básicos, como bancos ou oficinas administrativas”. Segundo explicou, moitos veciños aproveitan a súa visita para realizar xestións imprescindibles, como o pago de recibos, o abono de tributos ou o envío de documentación e paquetería.
Desde o Partido Popular esixen ao Goberno central a adopción de medidas urxentes que garantan un servizo postal digno e de calidade no rural lucense, evitando que a falta de persoal continúe a prexudicar á veciñanza do Valadouro e Alfoz.