O PP denuncia que Valboa e Ría de Abres continúan fóra dos plans de fibra óptica en Trabada
O Partido Popular volveu poñer o foco na situación da conectividade en Trabada ao asegurar que as parroquias de Valboa e Ría de Abres continúan sen previsión de acceso á rede de fibra óptica. A formación basea esta denuncia na resposta remitida polo Goberno central ás preguntas formuladas no Senado polos representantes populares lucenses José Manuel Barreiro, José Manuel Balseiro e Juan Serrano.
Os senadores solicitaran explicacións sobre os motivos polos que o despregamento da banda ancha de alta velocidade no municipio non inclúe estas dúas parroquias, ademais de preguntar polas previsións existentes para incorporalas aos futuros programas de extensión da fibra óptica.
Desde o PP consideran que a contestación remitida polo Executivo estatal non aclara a situación concreta de Valboa e Ría de Abres e interpretan que ambas quedan, polo momento, fóra dos plans previstos polo Goberno de Pedro Sánchez.
Os populares lembran tamén que a finais de 2025 o Grupo Popular conseguiu sacar adiante no Senado unha iniciativa orientada a reclamar melloras nas infraestruturas de telecomunicacións da provincia de Lugo. A proposta instaba ao Goberno de España a garantir o acceso á telefonía móbil e á fibra óptica en todos os municipios que aínda presentan deficiencias neste servizo.
José Manuel Balseiro advertiu de que, malia os anuncios sobre a redución da fenda dixital e a chegada de fondos europeos destinados á conectividade, aínda existen numerosas zonas rurais sen acceso a servizos básicos de telecomunicacións. Segundo sinalou, esta situación condiciona o desenvolvemento económico, laboral e educativo da veciñanza e das empresas situadas nestes territorios.
Pola súa banda, o portavoz do PP en Trabada, José María Fernández, cualificou a situación de “agravio” para os residentes nas parroquias afectadas, ao entender que se atopan nunha posición de desigualdade respecto doutros puntos do municipio que xa dispoñen de conexión mediante fibra óptica.
O representante popular preguntouse ademais polas xestións realizadas desde o goberno municipal para tratar de solucionar esta problemática e criticou a falta de influencia política do alcalde á hora de reclamar investimentos e melloras para o municipio.